ತಾಯಿಯ ನಿಸ್ವಾರ್ಥ ಸೇವೆಯಂತೆ ಸಮಾಜಸೇವೆಯಲ್ಲಿ ತೊಡಗಿಸಿಕೊಂಡಿದ್ದ ಮಹಾನ್ ಚೇತನ ಹೊ. ವೆ. ಶೇಷಾದ್ರಿ: ಮೋದಿ
ಬೆಂಗಳೂರು, ನ. 13: ವ್ಯಕ್ತಿ ನಿರ್ಮಾಣದ ಮೂಲಕ ರಾಷ್ಟ್ರ ನಿರ್ಮಾಣ ಮಾಡುವ ಮಹತ್ತರ ಕಾರ್ಯಕ್ಕೆ ತಮ್ಮ ಇಡೀ ಜೀವನವನ್ನು ಮುಡಿಪಾಗಿಟ್ಟಿದ್ದ ಹೊ.ವೆ. ಶೇಷಾದ್ರಿಯವರ ಜೀವನಾದರ್ಶಗಳು ಇಂದಿಗೂ ಕೋಟ್ಯಂತರ ಸ್ವಯಂಸೇವಕರಿಗೆ ಪ್ರೇರಣೆಯಾಗಿವೆ ಎಂದು ಪ್ರಧಾನಿ ನರೇಂದ್ರ ಮೋದಿ ಸ್ಮರಿಸಿದರು.
ಬೆಂಗಳೂರಿನ ನಡೆದ ಎಸ್ ವ್ಯಾಸದ ಪ್ರಶಾಂತಿ ಕುಟೀರಂನ ಸುವರ್ಣ ಮಹೋತ್ಸವ ಹಾಗೂ ಹೊ.ವೆ. ಶೇಷಾದ್ರಿಯವರ ಜನ್ಮಶತಾಬ್ದಿ ವರ್ಷದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
ಶೇಷಾದ್ರಿಯವರ ರಾಷ್ಟ್ರಸೇವೆ, ಸರಳತೆ, ವಿನಯ, ಸಂಘಟನಾ ಸಾಮರ್ಥ್ಯ ಮತ್ತು ಸಮಾಜದ ಬಗೆಗಿನ ನಿಸ್ವಾರ್ಥ ಕಾಳಜಿಯನ್ನು ಸ್ಮರಿಸಿ ಗೌರವ ನಮನ ಸಲ್ಲಿಸಿದರು. ದೇಶವನ್ನು ಯಶಸ್ಸಿನ ಶಿಖರಕ್ಕೆ ಕೊಂಡೊಯ್ಯಬೇಕಾದರೆ ಸಮರ್ಪಿತ, ಸಮರ್ಥ ಮತ್ತು ಶಿಸ್ತಿನ ನಾಗರಿಕರ ಅಗತ್ಯವಿದೆ ಎಂಬುದನ್ನು ಶೇಷಾದ್ರಿಯವರು ಅರಿತಿದ್ದರು. ವ್ಯಕ್ತಿಗಳನ್ನು ರೂಪಿಸುವುದಕ್ಕಾಗಿ ತಮ್ಮ ಜೀವನವನ್ನೇ ಸಮರ್ಪಿಸಿಕೊಂಡಿದ್ದರು. ರಾಷ್ಟ್ರೀಯ ಸ್ವಯಂಸೇವಕ ಸಂಘದಲ್ಲಿ ಅವರು ರೂಪಿಸಿದ ಆದರ್ಶಗಳು ಇಂದಿಗೂ ಕೋಟ್ಯಂತರ ಕಾರ್ಯಕರ್ತರಿಗೆ ದಾರಿದೀಪವಾಗಿವೆ ಎಂದು ಪ್ರಧಾನಿ ಹೇಳಿದರು.
ಶೇಷಾದ್ರಿಯವರನ್ನು ನೆನಪಿಸಿಕೊಂಡಾಗ ಮೊದಲು ಮನಸ್ಸಿಗೆ ಬರುವುದು ಅವರ ಸರಳತೆಯ ವ್ಯಕ್ತಿತ್ವ. ಅಪಾರ ಅನುಭವ ಮತ್ತು ದೊಡ್ಡ ವ್ಯಕ್ತಿತ್ವ ಹೊಂದಿದ್ದರೂ ಅವರಲ್ಲಿ ಅಷ್ಟೇ ವಿನಯವಿತ್ತು. ತಾವು ಹಿಂದೆ ನಿಂತು ಇತರರನ್ನು ಮುಂದೆ ತರುವುದು, ಜನರನ್ನು ಸಂಘಟಿಸುವುದು ಮತ್ತು ಅವರನ್ನು ರಾಷ್ಟ್ರಸೇವೆಗೆ ಸಿದ್ಧಗೊಳಿಸುವುದೇ ಅವರ ಜೀವನದ ಮಹತ್ತರ ಸಾಧನೆಯಾಗಿತ್ತು ಎಂದು ಮೋದಿ ಬಣ್ಣಿಸಿದರು.
ತಾಯಿಯ ನಿಸ್ವಾರ್ಥ ಸೇವೆಯೇ ಸಮಾಜಸೇವೆಗೆ ಮಾದರಿ
ಶೇಷಾದ್ರಿಯವರು ತಮ್ಮ ಮಾತುಗಳಲ್ಲಿ ಆಗಾಗ ತಾಯಿಯ ನಿಸ್ವಾರ್ಥ ಸೇವೆಯ ಉದಾಹರಣೆ ನೀಡುತ್ತಿದ್ದರು. ತಾಯಿ ತನ್ನ ಮಗುವಿನ ಆರೈಕೆಗಾಗಿ ಇಡೀ ರಾತ್ರಿ ನಿದ್ದೆ ಬಿಟ್ಟು ಶ್ರಮಿಸುತ್ತಾಳೆ. ಯಾವುದೇ ಪ್ರತಿಫಲಾಪೇಕ್ಷೆಯಿಲ್ಲದೆ ಮಗುವಿನ ಒಳಿತಿಗಾಗಿ ದುಡಿಯುತ್ತಾಳೆ. ಇದೇ ಭಾವನೆಯನ್ನು ಸಮಾಜದ ಸೇವೆಗೆ ವಿಸ್ತರಿಸಿದರೆ ಸಮಾಜಕ್ಕೆ ಎಷ್ಟು ದೊಡ್ಡ ಪ್ರಯೋಜನವಾಗಬಹುದು ಎಂದು ಅವರು ಹೇಳುತ್ತಿದ್ದರು ಎಂಬುದನ್ನು ಪ್ರಧಾನಿ ಸ್ಮರಿಸಿದರು.
ತಾಯಿಯ ನಿಷ್ಕಲ್ಮಶ ಪ್ರೀತಿಯಂತೆಯೇ ಶೇಷಾದ್ರಿಯವರು ಸಮಾಜಸೇವೆಯಲ್ಲಿ ತೊಡಗಿಸಿಕೊಂಡಿದ್ದರು. ಅವರ ನಿರಂತರ ಪ್ರೀತಿ, ಮಾರ್ಗದರ್ಶನ ಮತ್ತು ಅವರೊಂದಿಗೆ ಕಳೆದ ಕ್ಷಣಗಳು ತಮ್ಮ ಜೀವನದ ಅಮೂಲ್ಯ ನೆನಪುಗಳಾಗಿವೆ. “ನಾವು ಸಮಾಜಕ್ಕೆ ಎರಡೂ ಕೈಗಳಿಂದ ನೀಡಿದರೆ, ಸಮಾಜ ನಮಗೆ ಲಕ್ಷಾಂತರ ಕೈಗಳಿಂದ ಮರಳಿಸುತ್ತದೆ” ಎಂಬ ಶೇಷಾದ್ರಿ ಅವರ ಸಂದೇಶವನ್ನು ನೆನಪಿಸಿಕೊಂಡರು. ಜನರ ಸೇವೆಯಲ್ಲಿ ತೊಡಗಿಸಿಕೊಂಡಾಗ ಜನರಿಂದ ನಿರಂತರವಾಗಿ ಆಶೀರ್ವಾದ ದೊರೆತಿದೆ. ಅದುವೇ ತಮ್ಮ ಜೀವನದ ಬಹುದೊಡ್ಡ ಸಂಪತ್ತು ಎಂದು ಮೋದಿ ತಿಳಿಸಿದರು. ಶೇಷಾದ್ರಿಯವರ ಸೇವಾ ಪರಂಪರೆಯನ್ನು ಮುಂದುವರಿಸಿಕೊಂಡು ಹೋಗುತ್ತಿರುವ ಡಾ. ನಾಗೇಂದ್ರ ಮತ್ತು ಡಾ. ನಾಗರತ್ನ ಅವರ ಪ್ರಯತ್ನಗಳನ್ನೂ ಪ್ರಧಾನಿ ಶ್ಲಾಘಿಸಿದರು.
ಕಾರ್ಯಕ್ರಮದಲ್ಲಿ ಮಾತನಾಡಿದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಇಂದಿನ ಕಾರ್ಯಕ್ರಮದಲ್ಲಿ ಎರಡು ವಿಷಯಗಳನ್ನು ಜೋಡಿಸಲಾಗಿದೆ. ಎಸ್ ವ್ಯಾಸ ಸಂಸ್ಥೆಯ ಸ್ವರ್ಣಮಹೋತ್ಸವ ಹಾಗೂ ನನ್ನಂತಹ ಲಕ್ಷಾಂತರ ಕಾರ್ಯಕರ್ತರಿಗೆ ದೇಶಪ್ರೇಮದ ಪ್ರೇರಣೆ ನೀಡಿದ ಹೊ.ವೆ. ಶೇಷಾದ್ರಿಯವರ ಜನ್ಮಶತಾಬ್ದಿಯ ಕಾರ್ಯಕ್ರಮ. ಈ ಸುಸಂದರ್ಭದಲ್ಲಿ ಹೊ.ವೆ.ಶೇಷಾದ್ರಿಯವರ ಪುಣ್ಯಸ್ಮೃತಿಗೆ ನಮನವನ್ನು ಸಲ್ಲಿಸುತ್ತೇನೆ. ಯೋಗ ಕ್ಷೇತ್ರದಲ್ಲಿ ಭಾರತದಲ್ಲಿ ಮಾತ್ರವಲ್ಲದೇ ವಿಶ್ವದಲ್ಲಿ ತಮ್ಮ ವಿಶಿಷ್ಟ ಸಾಧನೆ, ಕರ್ತವ್ಯ ಮತ್ತು ಯೋಗದಾನದ ಮೂಲಕ ಗುರುತಿಸಿಕೊಂಡಿರುವ ಮತ್ತು ಮುಂದೆಯೂ ವಿಶ್ವದಲ್ಲಿ ವಿಶಿಷ್ಟ ಭೂಮಿಕೆಯನ್ನು ನಿಭಾಯಿಸುವುದಕ್ಕಾಗಿ ಸಿಧ್ಧಗೊಳ್ಳುತ್ತಿರುವ ಎಸ್ ವ್ಯಾಸದ ಸರ್ವರಿಗೂ ಅಭಿನಂದನೆಗಳನ್ನು ಸಲ್ಲಿಸುತ್ತೇನೆ ಎಂದರು.
ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸ್ವಯಂಸೇವಕರಾಗಿ, ಪ್ರಚಾರಕರಾಗಿ ವಿಭಿನ್ನ ಜವಾಬ್ದಾರಿಗಳನ್ನು ನಿಭಾಯಿಸಿದವರು ಮಾನ್ಯ ಹೊ.ವೆ.ಶೇಷಾದ್ರಿಯವರು. 13 ವರ್ಷಗಳ ಕಾಲ ಸರಕಾರ್ಯವಾಹರಾಗಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಕಾರ್ಯವನ್ನು ಸಮರ್ಥವಾಗಿ ನಿಭಾಯಿಸಿದವರು. ಅವರು ಬಹುಆಯಾಮದ ವ್ಯಕ್ತಿತ್ವದವರು. ಲೇಖಕರಾಗಿಯೂ ಪ್ರಸಿದ್ಧರಾದ ಅವರು 4000 ಪುಟಗಳಿಗೂ ಹೆಚ್ಚು ಬರವಣಿಗೆಯ ಮೂಲಕ ಭಾರತೀಯ ಸಂಸ್ಕೃತಿ, ಸಮಾಜ ಮತ್ತು ಯುವಕರು ನಿಭಾಯಿಸಬೇಕಾದ ಭೂಮಿಕೆಯ ಕುರಿತು ಕಾಲಕಾಲಕ್ಕೆ ಮಾರ್ಗದರ್ಶನ ನೀಡಿದವರು ಎಂದರು.
ನಮ್ಮ ದೇಶದ ಸಂಸ್ಕೃತಿಯ ಭಂಡಾರದಿಂದ ವಿಷಯಗಳನ್ನು ಸ್ವೀಕರಿಸಿ ಸಮಾಜದ ಮುಂದೆ ಇರಿಸಿದರು. ವಿಶ್ವದ ಸಾಹಿತ್ಯ ಜಗತ್ತಿನ ಕೆಲವು ವಿಷಯಗಳನ್ನು ಅವರು ನಮ್ಮಲ್ಲಿಗೆ ತಂದರು. ಆ ಸಮಯದಲ್ಲಿ ಸಮಾಜದ ಬೌದ್ಧಿಕ ವಲಯದಲ್ಲಿ ಗುರುತಿಸಿಕೊಂಡಿದ್ದ ವಿದ್ವತ್ ವಲಯದ ಪ್ರಮುಖರು, ಮಾನವ ಜಗತ್ತಿನ ಇತಿಹಾಸವನ್ನು ಅರಿತ ಮತ್ತು ಮುಂದೆ ಮಾನವರು ಏನನ್ನು ಮಾಡಬೇಕು ಎಂಬ ದಿಕ್ಕನ್ನು ತೋರಿಸಿದ ಚಿಂತಕರ ವಿಚಾರಗಳನ್ನು ಅಧ್ಯಯನ ಮಾಡಿದ್ದರು. ಆ ವಿಷಯಗಳನ್ನು ಸಾರಸರ್ವಸ್ವವಾಗಿ ಅವರು ತಮ್ಮ ಲೇಖನಗಳಲ್ಲಿ ನೀಡಿದರು ಎಂದು ನುಡಿದರು.
ಅವರ ಚಿಂತನೆ, ದೃಷ್ಟಿ, ಅನುಭವ ಮತ್ತು ಅವಲೋಕನದ ಮೂಲಕ ನೀಡಿದ ಅವರ ಸಾಹಿತ್ಯ ಇಂದಿಗೂ ವಿಶಿಷ್ಟ ಸಾಹಿತ್ಯವಾಗಿ ಓದುಗರ ಹೃದಯದಲ್ಲಿ ಗುರುತಿಸಿಕೊಂಡಿದೆ. ಸಾಮಾನ್ಯವಾದ ಉದಾಹರಣೆಯನ್ನು ಹಿಡಿದುಕೊಂಡು, ಇಡೀ ಲೇಖನವನ್ನು ಅದರ ಆಧಾರಿತವಾಗಿ ಬರೆದು, ಅದರ ಮೂಲಕ ಒಂದು ಹೊಸ ದಿಕ್ಕನ್ನು ನೀಡುತ್ತಿದ್ದರು. ಕನ್ನಡ ಸಾಹಿತ್ಯದಿಂದ ನಿಧಾನಕ್ಕೆ ಇಂಗ್ಲಿಷ್ ಮತ್ತು ಹಿಂದಿಯಲ್ಲೂ ಅವರು ಲೇಖನ ಮತ್ತು ಕೃತಿಗಳನ್ನು ಬರೆದರು. ಅದು ರಾಷ್ಟ್ರ, ಸಮಾಜಕ್ಕಾಗಿ ಕಾರ್ಯ ಮಾಡುವವರಿಗಾಗಿ ಮಾರ್ಗದರ್ಶನವಾಗಿದೆ. ಸಮಾಜದ ಸಾಮನ್ಯ ವ್ಯಕ್ತಿಗೂ ಅವರ ಲೇಖನ ಮತ್ತು ಪುಸ್ತಕಗಳಲ್ಲಿ ಮಾರ್ಗದರ್ಶನ ಪ್ರಾಪ್ತಿಯಾಗುತ್ತದೆ. ಅಂತಹ ಲೇಖಕ ಶೇಷಾದ್ರಿಯವರು ಎಂದು ಅಭಿಪ್ರಾಯಪಟ್ಟರು.
ಸೇವೆಯ ಕ್ಷೇತ್ರದಲ್ಲಿ ಸಂವೇದನಾಶೀಲ ವ್ಯಕ್ತಿತ್ವದವರಾದ್ದರಿಂದ ಅವರು ಮೊದಲು ಕರ್ನಾಟಕದಲ್ಲಿ ನಂತರ ಪೂರ್ತಿ ದೇಶದಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸೇವಾ ಆಯಾಮವನ್ನು ಮುಂದಕ್ಕೆ ಕೊಂಡೊಯ್ದರು. ಮಾನ್ಯ ಯಾದವರಾವ್ ಜೋಶಿಯವರ ಮಾರ್ಗದರ್ಶನದಲ್ಲಿ ಕರ್ನಾಟಕದಲ್ಲಿ ಆರಂಭವಾದ ಸೇವೆಯ ಕುರಿತಾದ ಒಂದು ಆಯಾಮ ನಂತರ ದೇಶವ್ಯಾಪಿ ಬೆಳೆದು ಸಂಘದ ಒಂದು ವಿಭಾಗವಾಗುವವರೆಗೆ ಬೆಳೆಸುವಲ್ಲಿ ಶೇಷಾದ್ರಿಗಳ ಯೋಗದಾನ ಪ್ರಮುಖವಾದದ್ದು ಎಂದು ಹೇಳಿದರು.
ವರ್ಷಪೂರ್ತಿ ಪ್ರವಾಸ ಮಾಡುತ್ತಿದ್ದ ಶೇಷಾದ್ರಿಯವರು ಅನೇಕ ಚಿಕ್ಕ ಚಿಕ್ಕ ಗ್ರಾಮಗಳನ್ನು ಭೇಟಿ ಮಾಡುತ್ತಿದ್ದರು. ಸಾವಿರಾರು, ಲಕ್ಷಾಂತರ ಸ್ವಯಂಸೇವಕರ ಪ್ರತ್ಯಕ್ಷ ಪರಿಚಯವನ್ನು ಇಟ್ಟುಕೊಂಡಿದ್ದರು. ಅವರು ಕಾರ್ಯಕರ್ತರಿಗೆ 10000ಕ್ಕೂ ಅಧಿಕ ಪತ್ರಗಳನ್ನು ಬರೆದಿದ್ದಾರೆ. ಅವುಗಳೆಲ್ಲದರಲ್ಲೂ ಅವರು ಮಾರ್ಗದರ್ಶನ ನೀಡಿದ್ದಾರೆ. ವ್ಯಕ್ತಿಗತ ರೂಪದಲ್ಲಿ ಅವರಿಗೆ ಸಾಂತ್ವನವನ್ನೂ ನೀಡಿದ್ದಾರೆ ಎಂದರು.
ಶೇಷಾದ್ರಿ ಅವರು ಯೋಗದ ಕ್ಷೇತ್ರದಲ್ಲೂ ಗುರುತಿಸಿಕೊಂಡವರು. ಅವರು ಭೇಟಿ ನೀಡುತ್ತಿದ್ದ ಮನೆಗಳಲ್ಲಿ ಎಲ್ಲಾ ವಯೋಮಿತಿಯ ವ್ಯಕ್ತಿಗಳಲ್ಲೂ ಅನೌಪಚಾರಿಕ ಮಾತುಕತೆಯ ಸಂದರ್ಭದಲ್ಲಿ ಯೋಗ, ಭಗವದ್ಗೀತೆ, ಭಾರತೀಯ ಸಂಸ್ಕೃತಿಯ ಕುರಿತು ತಿಳಿಸಿ ಅವರ ಜೀವನದಲ್ಲಿ ಅಳವಡಿಸಿಕೊಳ್ಳಲು ಪ್ರೇರಣೆ ನೀಡುತ್ತಿದ್ದರು. ಅವರು ಹೇಳಿದ ಮಾತಿನಂತೆ ನಡೆದ ಅನೇಕರು ಇಂದಿಗೂ ಅದನ್ನು ಪಾಲಿಸುತ್ತಿರುವುದು ನಾನು ಪ್ರವಾಸ ಮಾಡುವಾಗ ಸಿಗುವ ವ್ಯಕ್ತಿಗಳ ಮೂಲಕ ತಿಳಿದಿದ್ದೇನೆ. ಯೋಗವನ್ನು, ಅಧ್ಯಯನವನ್ನು, ಸೇವಾಕಾರ್ಯವನ್ನು ಅವರ ಜೀವನದ ಭಾಗವನ್ನಾಗಿಸಿಕೊಂಡವರು ಶೇಷಾದ್ರಿಯವರು ಎಂದು ನುಡಿದರು.
ಶೇಷಾದ್ರಿ ಅವರು ಯೋಗವನ್ನು ವ್ಯಕ್ತಿಯ ಶಾರೀರಿಕ, ಮಾನಸಿಕ ಆರೋಗ್ಯಕ್ಕಾಗಿ ಮಾತ್ರ ಸೀಮಿತವಾಗಿ ನೋಡದೆ, ಆಧುನಿಕ ಸಂದರ್ಭದಲ್ಲಿ ಎದುರಿಸುತ್ತಿರುವ ಹಲವು ಸಮಸ್ಯೆಗಳಿಗೆ ಇಡೀ ಮನುಕುಲವನ್ನು ಮಾರ್ಗದರ್ಶನ ಮಾಡುವ ವಿಸ್ಮಯವನ್ನಾಗಿ ಕಂಡರು. ಹಲವು ವರ್ಷಗಳ ಹಿಂದೆಯೇ ಶೇಷಾದ್ರಿ ಅವರು ಸಮಾಜಯೋಗ, ‘ಯೋಗ ದಿ ಸೋಶಿಯಲ್ ಇಂಪರೇಟಿವ್’ ಎಂಬ ಚಿಕ್ಕ ಪುಸ್ತಕವನ್ನೂ ಬರೆದಿದ್ದಾರೆ. ಇದೇ ಎಸ್ ವ್ಯಾಸ ಪರಿಸರದಲ್ಲಿ ಅನೇಕ ದಿನಗಳನ್ನು ಕಳೆದ ಅವರು ಇಲ್ಲಿಗೆ ಬರುತ್ತಿದ್ದ ವ್ಯಕ್ತಿಗಳು ಯೋಗವನ್ನು ಜೀವನವನ್ನಾಗಿಸಿ ಯೋಗಜೀವನವನ್ನು ನಡೆಸುತ್ತಿರುವುದರ ಕುರಿತು ಮತ್ತು ಅದರಿಂದ ಸಮಾಜದಲ್ಲಿ ಯೋಗಜೀವನದ ಮೂಲಕ ತಮ್ಮ ಬದುಕನ್ನು ಹೇಗೆ ಸಾರ್ಥಕಗೊಳಿಸಿಕೊಂಡಿದ್ದಾರೆ, ರಾಷ್ಟ್ರಕಾರ್ಯದಲ್ಲಿ ಜೋಡಿಸಿಕೊಂಡಿದ್ದಾರೆ, ಇನ್ನೊಬ್ಬರ ಉನ್ನತಿಗಾಗಿ ಶ್ರಮಿಸಿದ್ದಾರೆ, ಯೋಗಜೀವನ ಹೇಗೆ ಉಪಯುಕ್ತ ಅನ್ನುವುದನ್ನು ಅನೇಕ ಪ್ರಕಾರಗಳಲ್ಲಿ, ವಿಭಿನ್ನ ಆಯಾಮಗಳಲ್ಲಿ ಅವರು ವಿವರಿಸಿದ್ದಾರೆ ಎಂದು ಹೇಳಿದರು.
ಬುದ್ಧಿಧರ್ಮಿ, ಲೇಖಕ, ಗಂಭೀರ ವ್ಯಕ್ತಿತ್ವದವರಾಗಿದ್ದ ಅವರು ಜೀವನದಲ್ಲಿ ಸರಳತೆಗೂ ಮಹತ್ವವನ್ನು ನೀಡಿದವರು. ಅವರ ಜೀವನಶೈಲಿ ನೋಡಿದರೆ ಅವರು ಎಂಎಸ್ಸಿ ಚಿನ್ನದ ಪದಕ ಪಡೆದವರ ಹಾಗಾಗಲಿ, ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹ ಜವಾಬ್ದಾರಿಯನ್ನು ನಿಭಾಯಿಸಿದವರಂತಾಗಲಿ ಕಾಣುತ್ತಿರಲಿಲ್ಲ. ಅಷ್ಟು ಸರಳ ವ್ಯಕ್ತಿತ್ವ ಅವರದ್ದಾಗಿತ್ತು. ಶೇಷಾದ್ರಿಯವರು ಗಂಭೀರ ವ್ಯಕ್ತಿತ್ವದವರಾಗಿದ್ದರೂ ಸ್ವಯಂಹಾಸ್ಯವನ್ನು ಮಾಡಿಕೊಳ್ಳುತ್ತಿದ್ದ ನಮ್ರತೆಯೂ ಅವರಲ್ಲಿತ್ತು. ಭಗವದ್ಗೀತೆಯಲ್ಲಿ ಸಾತ್ವಿಕರು ಹೇಗಿರುತ್ತಾರೆ ಎಂಬ ವರ್ಣನೆ ಬರುತ್ತದೆ. ಅದರಂತೆ ಇದ್ದವರು ಶೇಷಾದ್ರಿಗಳು ಎಂದು ತಿಳಿಸಿದರು.
ಕಾರ್ಯಕ್ರಮದಲ್ಲಿ ಹೊ.ವೆ.ಶೇಷಾದ್ರಿ ಅವರ ಆರು ಪುಸ್ತಕಗಳನ್ನು ಬಿಡುಗಡೆ ಮಾಡಲಾಯಿತು.
ಕಾರ್ಯಕ್ರಮದಲ್ಲಿ ಕರ್ನಾಟಕದ ರಾಜ್ಯಪಾಲೆ ಡಾ. ಸುಧಾ ಯಾದವ್, ದಕ್ಷಿಣ ಕೊರಿಯಾದ ಮಿರ್ಯಾಂಗ್ ನಗರದ ಮೇಯರ್ ಆನ್ ಬ್ಯಿಂಗ್ ಗೂ, ಎಸ್ ವ್ಯಾಸ ಸೊಸೈಟಿಯ ಅಧ್ಯಕ್ಷ ಡಾ. ಹೆಚ್. ಆರ್. ನಾಗೇಂದ್ರ, ಉಪಾಧ್ಯಕ್ಷ ಸತೀಶ್ ಗುಪ್ತಾ, ಎಸ್ ವ್ಯಾಸ ವಿಶ್ವವಿದ್ಯಾನಿಲಯದ ಕುಲಪತಿ ಡಾ.ಹೆಚ್.ಆರ್. ದಯಾನಂದ ಸ್ವಾಮಿ ಸೇರಿದಂತೆ ಅನೇಕ ಗಣ್ಯರು ಉಪಸ್ಥಿತರಿದ್ದರು.
ಕಾರ್ಯಕ್ರಮದಲ್ಲಿ ಬಿಡುಗಡೆಗೊಂಡ ಆರು ಪುಸ್ತಕಗಳು
- ಯುಗಾವತಾರ (YUGAVATARA)
ಹೊ.ವೆ ಶೇಷಾದ್ರಿ ಅವರು ರಚಿಸಿರುವ ಐತಿಹಾಸಿಕ ಕಾದಂಬರಿ ‘ಯುಗಾವತಾರ’ ಛತ್ರಪತಿ ಶಿವಾಜಿ ಮಹಾರಾಜರ ಪ್ರೇರಣಾದಾಯಕ ದೂರದೃಷ್ಟಿ, ಶೌರ್ಯ ಮತ್ತು ಹಿಂದವಿ ಸ್ವರಾಜ್ಯದ ಸ್ಥಾಪನೆಯಲ್ಲಿ ಅವರು ಬೀರಿದ ಅಳಿಸಲಾಗದ ಪ್ರಭಾವವನ್ನು ಕಟ್ಟಿಕೊಡುತ್ತದೆ. ಮೂಲತಃ ಕನ್ನಡದಲ್ಲಿ ರಚನೆಯಾದ ಈ ಕೃತಿಯನ್ನು ಪ್ರಶಾಂತ್ ವೈದ್ಯರಾಜ್ ಅವರು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ.
2.ಕ್ರಾಂತಿಯಲ್ಲ ಭ್ರಾಂತಿ (Not a Revolution, but a Delusion)
ಹೊ.ವೆ ಶೇಷಾದ್ರಿ ಅವರ ಕನ್ನಡ ಕೃತಿ ‘ಕ್ರಾಂತಿಯಲ್ಲ ಭ್ರಾಂತಿ’ಯ ಇಂಗ್ಲಿಷ್ ಅನುವಾದವೇ ‘ನಾಟ್ ಎ ರೆವಲ್ಯೂಷನ್, ಬಟ್ ಎ ಡಿಲ್ಯೂಷನ್’. ಈ ಕೃತಿಯನ್ನು ಡಾ. ನಂದನ್ ಪ್ರಭು ಅವರು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಕಮ್ಯುನಿಸಂನ ಭರವಸೆಗಳು ಮತ್ತು ವಾಸ್ತವಿಕತೆಗಳ ಕುರಿತು ಈ ಕೃತಿ ವಿಶ್ಲೇಷಿಸುತ್ತದೆ. ಅದರ ಸಿದ್ಧಾಂತ, ಕಾರ್ಯವಿಧಾನ ಹಾಗೂ ವೈಯಕ್ತಿಕ ಸ್ವಾತಂತ್ರ್ಯ, ರಾಷ್ಟ್ರೀಯ ಅಸ್ಮಿತೆ ಮತ್ತು ಸಮಾಜದ ಮೇಲೆ ಬೀರುವ ಪರಿಣಾಮಗಳನ್ನು ಪರಿಶೀಲಿಸುತ್ತದೆ. ರಾಜಕೀಯ ಭರವಸೆಗಳನ್ನು ಮೀರಿ, ಅವುಗಳ ಪರಿಣಾಮಗಳನ್ನು ವಿಮರ್ಶಾತ್ಮಕವಾಗಿ ಅವಲೋಕಿಸುವಂತೆ ಓದುಗರನ್ನು ಪ್ರೇರೇಪಿಸುವ ಚಿಂತನೆಗೆ ಹಚ್ಚುವ ಲೇಖನಗಳ ಸಂಕಲನ ಇದಾಗಿದೆ.
3. ‘ನವ ನಿರ್ಮಾಣದ ಒಳಪದರಗಳು’ (The Hidden Layers of National Renaissance)
ಹೊ.ವೆ ಶೇಷಾದ್ರಿ ಅವರು ಮೂಲತಃ ಕನ್ನಡದಲ್ಲಿ ‘ನವ ನಿರ್ಮಾಣದ ಒಳಪದರಗಳು’ ಎಂಬ ಶೀರ್ಷಿಕೆಯಡಿ ರಚಿಸಿರುವ ಈ ಕೃತಿಯ ಇಂಗ್ಲಿಷ್ ಅನುವಾದವನ್ನು ನಳಿನಿ ಕೇಶವಮೂರ್ತಿ ಅವರು ಮಾಡಿದ್ದಾರೆ. ವ್ಯಕ್ತಿತ್ವ ನಿರ್ಮಾಣ, ಸಾಂಸ್ಕೃತಿಕ ಪರಂಪರೆ, ಶಿಕ್ಷಣ ಮತ್ತು ಸಾಮಾಜಿಕ ಹೊಣೆಗಾರಿಕೆಯ ಕುರಿತು ಆಳವಾದ ಚಿಂತನೆಗಳನ್ನು ಒಳಗೊಂಡಿರುವ ಈ ಪ್ರಬಂಧಗಳು ರಾಷ್ಟ್ರದ ಪುನರ್‌ನಿರ್ಮಾಣಕ್ಕೆ ಅಗತ್ಯವಾದ ಮೂಲಭೂತ ಮೌಲ್ಯಗಳು ಹಾಗೂ ಆಂತರಿಕ ಅಡಿಪಾಯಗಳನ್ನು ವಿಶ್ಲೇಷಿಸುತ್ತವೆ.
4.ವಿಕೃತಿಯಿಂದ ಸಂಸ್ಕೃತಿಯೆಡೆಗೆ (From Distortion Towards Cultural Awakening)
ಹೊ.ವೆ ಶೇಷಾದ್ರಿ ಅವರ ‘ವಿಕೃತಿಯಿಂದ ಸಂಸ್ಕೃತಿಯೆಡೆಗೆ’ ಎಂಬ ಕನ್ನಡ ಕೃತಿಯ ಇಂಗ್ಲಿಷ್ ಅನುವಾದವೇ ‘ಫ್ರಮ್ ಡಿಸ್ಟಾರ್ಷನ್ ಟುವರ್ಡ್ಸ್ ಕಲ್ಚರಲ್ ಅವೇಕನಿಂಗ್’. ಸತ್ಯನಾರಾಯಣ ಶಾನಭಾಗ್ ಅವರು ಈ ಕೃತಿಯನ್ನು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಭಾರತೀಯ ಸಮಾಜ, ಸಂಸ್ಕೃತಿ ಮತ್ತು ಹಿಂದೂ ಚಿಂತನೆಗಳ ಕುರಿತು ಪ್ರಚಲಿತದಲ್ಲಿರುವ ತಪ್ಪುಗ್ರಹಿಕೆಗಳನ್ನು ಈ ಪುಸ್ತಕ ವಿಶ್ಲೇಷಿಸುತ್ತದೆ. ಧರ್ಮ, ಸಾಮಾಜಿಕ ಹೊಣೆಗಾರಿಕೆ ಮತ್ತು ರಾಷ್ಟ್ರೀಯ ಜೀವನದ ಮೌಲ್ಯಗಳನ್ನು ಸಾಂಸ್ಕೃತಿಕ ಪುನರುತ್ಥಾನದ ಪ್ರಮುಖ ಆಧಾರಗಳಾಗಿ ಎತ್ತಿಹಿಡಿಯುತ್ತದೆ.
5. ತಾಯಿ ಕಾದಿಹಳು (Mother Awaits)
ಹೊ.ವೆ ಶೇಷಾದ್ರಿ ಅವರು ಮೂಲತಃ ಕನ್ನಡದಲ್ಲಿ ‘ತಾಯಿ ಕಾದಿಹಳು’ ಎಂಬ ಶೀರ್ಷಿಕೆಯಡಿ ರಚಿಸಿರುವ ಈ ಕೃತಿಯನ್ನು ಮಂಜುಳಾ ಟೆಕಲ್ ಅವರು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಈ ಪುಸ್ತಕದಲ್ಲಿ ಹದಿನೈದು ಪ್ರಬಂಧಗಳಿದ್ದು, ರಾಷ್ಟ್ರೀಯ ಪ್ರಜ್ಞೆ, ಸಾಂಸ್ಕೃತಿಕ ಪರಂಪರೆ, ವ್ಯಕ್ತಿತ್ವ ನಿರ್ಮಾಣ ಮತ್ತು ಧರ್ಮದಂತಹ ಶಾಶ್ವತ ಮೌಲ್ಯಗಳನ್ನು ವಿಶ್ಲೇಷಿಸಲಾಗಿದೆ. ರಾಷ್ಟ್ರದ ಭವಿಷ್ಯವನ್ನು ರೂಪಿಸುವಲ್ಲಿ ಈ ಮೌಲ್ಯಗಳ ಮಹತ್ವವನ್ನು ಕೃತಿ ಮನಮುಟ್ಟುವಂತೆ ವಿವರಿಸುತ್ತದೆ.
6. ಮೃಗಜಲ ಮತ್ತು ನಿಜಜಲ (The Mirage and Reality)
ಹೊ.ವೆ ಶೇಷಾದ್ರಿ ಅವರು ಮೂಲತಃ ಕನ್ನಡದಲ್ಲಿ ‘ಮೃಗಜಲ ನಿಜಜಲ’ ಎಂಬ ಶೀರ್ಷಿಕೆಯಡಿ ರಚಿಸಿರುವ ಪ್ರಬಂಧಗಳ ಸಂಕಲನವೇ ‘ದಿ ಮಿರಾಜ್ ಅಂಡ್ ರಿಯಾಲಿಟಿ’. ಸತ್ಯನಾರಾಯಣ ಶಾನಭಾಗ್ ಅವರು ಈ ಕೃತಿಯನ್ನು ಇಂಗ್ಲಿಷ್‌ಗೆ ಅನುವಾದಿಸಿದ್ದಾರೆ. ಮಾನವ ಸ್ವಭಾವ, ಸಾಂಸ್ಕೃತಿಕ ಮೌಲ್ಯಗಳು, ನೈತಿಕತೆ ಮತ್ತು ಸಮಕಾಲೀನ ನಾಗರಿಕತೆಯ ವಿವಿಧ ಆಯಾಮಗಳನ್ನು ಒಳಗೊಂಡಿರುವ ಈ ಕೃತಿ, ವ್ಯಕ್ತಿಜೀವನ ಹಾಗೂ ರಾಷ್ಟ್ರೀಯ ಪ್ರಜ್ಞೆಯನ್ನು ರೂಪಿಸುವ ಆಳವಾದ ಸತ್ಯಗಳನ್ನು ಅನ್ವೇಷಿಸುತ್ತದೆ.
