ಬೆಂಗಳೂರು, ನವೆಂಬರ್ 17, 2026: ಇಂದಿನ ಯುವಕರು ದೇಶದ ಸ್ವಾಭಿಮಾನ ಮತ್ತು ಇತಿಹಾಸದೊಂದಿಗೆ ಜೋಡಿಸಿಕೊಂಡಿದ್ದಾರೆ. ಕ್ರಿಕೆಟ್, ಸಿನೆಮಾ ಎಲ್ಲೇ ಇರಲಿ ‘ಯುವಕರಿಗೆ ಜಯ್ ಶ್ರೀರಾಮ್’, ‘ಭಾರತ್ ಮಾತಾ ಕಿ ಜಯ್’ ಎಂದು ಹೇಳಲು ಯಾವುದೇ ಸಂಕೋಚವನ್ನು ಹೊಂದಿಲ್ಲ. ಇದು ಭಾರತೀಯ ಯುವಕರಲ್ಲಿ ಹೆಚ್ಚಾದ ಸಾಂಸ್ಕೃತಿಕ ಆತ್ಮವಿಶ್ವಾಸವು ಹೆಚ್ಚಾಗಿದೆ. ಈ ಆತ್ಮವಿಶ್ವಾಸವನ್ನು ಪ್ರತಿ ಭಾರತೀಯರಲ್ಲಿ ಮೂಡಿಸಲೆಂದೇ ರಾಷ್ಟ್ರೀಯ ಸ್ವಯಂಸೇವಕ ಸಂಘವು ನೂರು ವರ್ಷಗಳಿಂದ ಶ್ರಮಿಸುತ್ತಿದೆ ಎಂದು ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಅಖಿಲ ಭಾರತೀಯ ಪ್ರಚಾರ ಪ್ರಮುಖ್ ಸುನೀಲ್ ಅಂಬೇಕರ್ ಹೇಳಿದರು.

ಮಂಥನ ಬೆಂಗಳೂರು ವತಿಯಿಂದ ಆಯೋಜಿಸಲಾದ ಲೇಖಕಿ ರಶ್ಮೀ ಸಾಮಂತ್ ಅವರು ಸಂಪಾದಿಸಿರುವ ‘Hundred Years Young: Rashtriya Swayamsevak Sangh’ ಕೃತಿ ಬಿಡುಗಡೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.
ಭಾರತೀಯ ಯುವಕರಿಗೆ ದೇಶದ ವ್ಯವಸ್ಥೆಯ ಮೇಲೆ ವಿಶ್ವಾಸವಿದೆ
ಭಾರತದ ಯುವಕರನ್ನು ದಾರಿ ತಪ್ಪಿಸುವ ಪ್ರಯತ್ನಗಳು ವಿಶ್ವದ ಅನೇಕ ಕಡೆಗಳಿಂದ ನಡೆಯುತ್ತಿವೆ. ಜಗತ್ತಿನ ಅನೇಕ ದೇಶಗಳಲ್ಲಿ ಈ ಪ್ರಯತ್ನ ಫಲಿಸಿ ಅಲ್ಲಿನ ವ್ಯವಸ್ಥೆಯನ್ನು ಅಸ್ಥಿರಗೊಳಿಸಿದ್ದಾರೆ. ಆದರೆ ಬೇರೆ ದೇಶಗಳಲ್ಲಿ ನಡೆದಂತೆ ನಮ್ಮ ದೇಶದಲ್ಲಿ ಅವರ ಷಡ್ಯಂತ್ರ ಫಲಿಸುತ್ತಿಲ್ಲ. ಏಕೆಂದರೆ ದೇಶದ ವ್ಯವಸ್ಥೆಗಳ ಮೇಲೆ ಯುವಕರಿಗೆ ನಂಬಿಕೆ ಇದೆ. ಅವರು ಸಂವಿಧಾನಬದ್ಧರಾಗಿದ್ದಾರೆ. ಈ ದೇಶವನ್ನು ಅವರು ಎಂದಿಗೂ ಸೋಲಲು ಬಿಡುವುದಿಲ್ಲ. ಅವರ ಮೇಲೆ ಅಪನಂಬಿಕೆ ಬೇಡ. ವಿಶ್ವಾಸವನ್ನು ಇಡಬೇಕು ಎಂದು ಅಭಿಪ್ರಾಯಪಟ್ಟರು.
ಸಂಘ ಮತ್ತು ಅದರ ಮನವು ಸದಾ ಯೌವನದಿಂದ ತುಂಬಿರುತ್ತದೆ. ಹಾಗಾಗಿ ಅದು ಪ್ರತಿ ಪೀಳಿಗೆಯ ಯುವಕರ ಧ್ವನಿಯಂತೆ ಕಾರ್ಯನಿರ್ವಹಿಸುತ್ತಿದೆ. ನಮ್ಮ ಸಂಘಟನೆ ಹಳೆಯದಾದರೂ ಅದು ಸದಾ ಪ್ರಸ್ತುತ ಎಂದು ನುಡಿದರು.

ಸಂಘದ ಮೇಲೆ ಆರೋಪಗಳೇಕೆ?
ಸಂಘದ ಮೇಲೆ ಆಗಾಗ ಆರೋಪಗಳು ಯಾಕೆ ಬರುತ್ತದೆ ಎಂದು ಕೇಳುತ್ತಿರುತ್ತಾರೆ. ಅದಕ್ಕೆ ನಮ್ಮ ಉತ್ತರ ಅದು ಒಳ್ಳೆಯದೇ. ಅದರಿಂದಾಗಿಯೂ ಸಂಘದ ನೆನಪು ಸಮಾಜದಲ್ಲಿ ಉಳಿಯುವಂತಾಗಿದೆ. ಅದರ ಮೂಲಕ ಸಂಘದ ಕುರಿತು ಹೆಚ್ಚು ಸ್ಪಷ್ಟತೆ ಜನರಿಗೆ ಬರುತ್ತಿದೆ. ಸಂಘ ಸಮಾಜದ ಸಂಘಟನೆಯಾದ್ದರಿಂದ ಅದರ ಕುರಿತು ಪ್ರಶ್ನೆಗಳು ಬರಲೇಬೇಕು, ಹೊಸ ಮಾತುಗಳು, ಹೊಸ ಯೋಚನೆಗಳು ಮೂಡಲೇಬೇಕು ಎಂದರು.
ಹಿಂದು ಸಮಾಜದಲ್ಲಿ ಏನೇ ಕೊರತೆಯಾದರೂ ಸಂಘವನ್ನು ಪ್ರಶ್ನಿಸುತ್ತಾರೆ. ಏಕೆಂದರೆ ಸಂಘ ಮೊದಲಿನಿಂದಲೂ ದೇಶ ನಮ್ಮದು, ಸಮಾಜ ನಮ್ಮದು ಎಂದು ಕರ್ತವ್ಯ ನಿಭಾಯಿಸುತ್ತಿದೆ. ದೇಶ ಮತ್ತು ಸಮಾಜವನ್ನು ನಮ್ಮದು ಎನ್ನದೇ ಕೇವಲ ಟೀಕೆ ಮಾಡಲು ಆಗುವುದಿಲ್ಲ. ದೇಶ ನಮ್ಮದು ಎಂದಮೇಲೆ ದೇಶದ ಸಮಸ್ಯೆಗಳಿಗೆ ಪರಿಹಾರಗಳನ್ನು ಕಂಡು ಹಿಡಿಯಬೇಕು ಎಂದರು.

ದೇಶದ ಜವಾಬ್ದಾರಿ ಎಲ್ಲರದ್ದೂ ಆಗಿದೆ
ದೇಶದ ಜವಾಬ್ದಾರಿ ಕೆಲವರದ್ದಲ್ಲ. ಅದು ಎಲ್ಲರದ್ದೂ ಆಗಬೇಕು. ಹಾಗೆಯೇ ಆ ಜವಾಬ್ದಾರಿ ಯಾವುದೋ ಒಂದು ಪೀಳಿಗೆಯದ್ದಲ್ಲ, ಬರುವ ಪ್ರತಿ ಪೀಳಿಗೆಯದ್ದೂ ಆಗಿದೆ. ಸಂಘ ಭಾರತದ ಉಜ್ವಲ ಭವಿಷ್ದಯಕ್ಕಾಗಿ ಇದೆ, ಯುವಕರ ಕನಸ್ಸುಗಳಿಗೆ ತಕ್ಕಂತೆ ಕಾರ್ಯನಿರ್ವಹಿಸುತ್ತಿದೆ. ಇಂದಿನ ಯುವ ಪೀಳಿಗೆ ದೇಶದ ಮೇಲೆ ವಿಶ್ವಾಸವನ್ನು ಹೊಂದಿದೆ ಭಾರತದ ಯುವಕರು ಭಾರತೀಯ ಸಂಸ್ಕೃತಿಯೊಂದಿಗೆ ರಾಜಿಯಾಗಲಾರರು ಎಂದು ನುಡಿದರು.
ಸಾಂಸ್ಕೃತಿಕ ಆತ್ಮವಿಶ್ವಾಸ ಹೆಚ್ಚಿಸುವುದು ಸಂಘದ ಗುರಿ
ಸಾಂಸ್ಕೃತಿಕ ಆತ್ಮವಿಶ್ವಾಸವನ್ನು ಹೆಚ್ಚಿಸಲು ಸಂಘವನ್ನು ಡಾ.ಹೆಡಗೇವಾರ್ ಸಂಘವನ್ನು ಆರಂಭಿಸಿದರು. ಇಂದು
ಲಕ್ಷಾಂತರ ಜನರು ಆ ಸಾಂಸ್ಕೃತಿಕ ಆತ್ಮವಿಶ್ವಾಸವನ್ನು ಹೊಂದಿದವರು ಸಮಾಜದಲ್ಲಿದ್ದಾರೆ. ಯುವಕರು ಇದರ ಆಧಾರಿತ ಅಸ್ಮಿತೆಯಲ್ಲಿ ಆತ್ಮವಿಶ್ವಾಸವನ್ನು ಹೊಂದಿದ್ದಾರೆ ಎಂದರು.

ಕೋಟ್ಯಂತರ ಯುವಕರ ಮನಸ್ಸಿನ ಮಾತಿನ ಪ್ರತಿನಿಧಿ ಈ ಕೃತಿ
ಭಾರತದ ಭವಿಷ್ಯ ಉಜ್ವಲವಾಗಿದೆ. ಸವಾಲುಗಳು ಎದುರಾಗಬಹುದು. ಆ ಸವಾಲುಗಳನ್ನು ಎದುರಿಸಲು ಇಂದಿನ ಯುವಕರು ಸಮರ್ಥರಾಗಿದ್ದಾರೆ. A Hundred Young ಕೃತಿಯಲ್ಲಿ ಅಭಿವ್ಯಕ್ತವಾದ ಅಭಿಪ್ರಾಯ ಕೇವಲ 20 ಮಂದಿಯದ್ದಲ್ಲದೇ, ಅಂತಹ ಕೋಟಿ ಯುವಕರ ಪ್ರತಿನಿಧಿ ಆಗಿದೆ. ಕೃತಿಗೆ ಶೀರ್ಷಿಕೆಯೂ ಸೂಕ್ತವಾಗಿದೆ ಎಂದರು.
ಸಂವಾದದ ಮನಸ್ಥಿತಿಯನ್ನು ಸಮಾಜದಲ್ಲಿ ಮೂಡಿಸಿದೆ ಸಂಘ
ಕಠಿಣಾತಿ ಕಠಿಣ ಸಂದರ್ಭಗಳಲ್ಲೂ ಸಮಾಜದಲ್ಲಿ ಸಂವಾದದ ಮನಸ್ಥಿತಿಯನ್ನು ಸಂಘ ರೂಪಿಸಿದೆ. ಅದಕ್ಕೆ ಮಣಿಪುರದಂತಹ ಪ್ರದೇಶಗಳಲ್ಲಿ ಅಲ್ಲಿನ ಯುವಕರೊಂದಿಗೆ ಸಂವಾದ ನಡೆಸಿದ ಸಂಘದ ಪ್ರಯತ್ನವೇ ಸಾಕ್ಷಿ. ಯುವಕರು ಭಾರತವನ್ನು ಅರಿತುಕೊಂಡರೆ, ದೇಶದ ಸಂರಕ್ಷಣೆಗಾಗಿ ಟೊಂಕಕಟ್ಟಿ ನಿಲ್ಲುತ್ತಾರೆ ಎನ್ನುವುದು ಇತಿಹಾಸದಲ್ಲಿ ಹಲವು ನಿದರ್ಶನಗಳಲ್ಲಿ ಸಾಬೀತಾಗಿದೆ ಎಂದರು.


ಕಾರ್ಯಕ್ರಮದಲ್ಲಿ ಮಾತನಾಡಿದ ಕೃತಿಯ ಸಂಪಾದಕಿ ರಶ್ಮೀ ಸಾಮಂತ್ ಈ ಪುಸ್ತಕದ ಸಂಪಾದಕಿಯಾಗಿರುವುದು ತಮ್ಮ ಜೀವನದ ಅತ್ಯಂತ ಗೌರವದ ಕ್ಷಣಗಳಲ್ಲಿ ಒಂದು ಎಂದು ಅಭಿಪ್ರಾಯಪಟ್ಟರು. ಆರ್ಎಸ್ಎಸ್ನ ನೂರು ವರ್ಷಗಳ ಪಯಣವನ್ನು ಕೇವಲ ಸಂಘಟನೆಯ ಇತಿಹಾಸವಾಗಿ ನೋಡದೆ, ಅದರೊಂದಿಗೆ ಬೆಸೆದುಕೊಂಡಿರುವ ವ್ಯಕ್ತಿಗಳ ಬದುಕಿನ ಅನುಭವಗಳ ಮೂಲಕ ಪರಿಚಯಿಸುವುದು ಪುಸ್ತಕದ ಮುಖ್ಯ ಉದ್ದೇಶವಾಗಿದೆ ಎಂದರು.
ಯುವಜನರ ಚಿಂತನೆಯಿಂದ ರೂಪುಗೊಂಡ ಕೃತಿ
1925ರಲ್ಲಿ ಸಂಘದ ಸ್ಥಾಪನೆಯಾದಾಗಿನಿಂದ ಅದರ ಬೆಳವಣಿಗೆಯಲ್ಲಿ ಯುವಜನರ ಪಾತ್ರ ಮಹತ್ವದ್ದಾಗಿದೆ. ಇತಿಹಾಸದ ವಿವಿಧ ಘಟ್ಟಗಳಲ್ಲಿ ದೇಶದ ದಿಕ್ಕನ್ನು ರೂಪಿಸುವಲ್ಲಿ ಯುವಕರು ನಿರ್ಣಾಯಕ ಪಾತ್ರವಹಿಸಿದ್ದಾರೆ. ಇದೇ ಚಿಂತನೆಯ ಹಿನ್ನೆಲೆಯಲ್ಲಿ ಈ ಪುಸ್ತಕದ ಪರಿಕಲ್ಪನೆ ರೂಪುಗೊಂಡಿತು ಎಂದು ರಶ್ಮಿ ಸಾಮಂತ್ ವಿವರಿಸಿದರು.
ಭಾರತ ಮತ್ತು ವಿದೇಶಗಳ 20 ಮಂದಿ ತಮ್ಮ ವೈಯಕ್ತಿಕ ಅನುಭವಗಳ ಮೂಲಕ ಆರ್ಎಸ್ಎಸ್ನೊಂದಿಗಿನ ಸಂಬಂಧವನ್ನು ದಾಖಲಿಸಿದ್ದಾರೆ. ಕೆಲವರು ತಮ್ಮ ತಂದೆ, ತಾತ ಹಾಗೂ ಕುಟುಂಬದ ಹಿರಿಯರಿಂದ ಪಡೆದ ಪ್ರೇರಣೆಯನ್ನು ಹಂಚಿಕೊಂಡಿದ್ದರೆ, ಇನ್ನು ಕೆಲವರು ಸಂಘದೊಂದಿಗೆ ತಮ್ಮದೇ ಆದ ಅನುಭವಗಳು ಮತ್ತು ಸಂವಾದಗಳನ್ನು ಕಟ್ಟಿಕೊಟ್ಟಿದ್ದಾರೆ.

ಕೃತಕ ಬುದ್ಧಿಮತ್ತೆ ಮತ್ತು ಗೂಗಲ್ನಂತಹ ತಂತ್ರಜ್ಞಾನಗಳ ಯುಗದಲ್ಲಿಯೂ ಪುಸ್ತಕಗಳ ಪ್ರಸ್ತುತತೆ ಕಡಿಮೆಯಾಗುವುದಿಲ್ಲ. ಏಕೆಂದರೆ ತಂತ್ರಜ್ಞಾನ ಮಾಹಿತಿಯನ್ನು ಒದಗಿಸಬಹುದು; ಆದರೆ ವ್ಯಕ್ತಿಗಳ ಜೀವನಾನುಭವಗಳು, ನೆನಪುಗಳು ಮತ್ತು ಭಾವನೆಗಳನ್ನು ಪುಸ್ತಕಗಳು ವಿಶಿಷ್ಟವಾಗಿ ದಾಖಲಿಸುತ್ತವೆ ಎಂದು ಅವರು ಹೇಳಿದರು.
‘ಪ್ರಸಿದ್ಧಿ ಪರಾನ್ಮುಖತೆ’ ಮನ್ನಣೆಗಿಂತ ಸೇವೆಗೆ ಆದ್ಯತೆ
ಆರ್ಎಸ್ಎಸ್ನ ಕಾರ್ಯವೈಖರಿಯನ್ನು ವಿವರಿಸಿದ ಅವರು, ಸಂಘದ ಪ್ರಮುಖ ಮೌಲ್ಯಗಳಲ್ಲಿ ಒಂದಾದ ‘ಪ್ರಸಿದ್ಧಿ ಪರಾನ್ಮುಖತೆ’ಯನ್ನು ಉಲ್ಲೇಖಿಸಿದರು. ಅಂದರೆ ಪ್ರಚಾರ ಅಥವಾ ವೈಯಕ್ತಿಕ ಮನ್ನಣೆಯನ್ನು ಬಯಸದೆ, ಸಮಾಜದ ಹಿತಕ್ಕಾಗಿ ನಿರಂತರವಾಗಿ ಕೆಲಸ ಮಾಡುವುದು. ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುವ ಸಂಘದ ಸಾಧನೆಗಳು ಅದರ ಒಟ್ಟು ಕಾರ್ಯದ ಒಂದು ಸಣ್ಣ ಭಾಗವಷ್ಟೇ ಆಗಿದೆ. ತೆರೆಮರೆಯಲ್ಲಿ ನಡೆಯುವ ಸಾವಿರಾರು ಸೇವಾ ಕಾರ್ಯಗಳು ಸಮಾಜಕ್ಕೆ ಬಹುಪಾಲು ತಿಳಿದಿರುವುದಿಲ್ಲ ಎಂಬ ಆಶಯವನ್ನು ವ್ಯಕ್ತಪಡಿಸಿದರು.
ವಿವಿಧ ಕ್ಷೇತ್ರಗಳ 20 ಸಾಧಕರ ಅನುಭವಗಳು
ಈ ಪುಸ್ತಕದಲ್ಲಿ ಕಾನೂನು, ಸಿನಿಮಾ, ಕ್ರೀಡೆ, ಪತ್ರಿಕೋದ್ಯಮ, ಉದ್ಯಮ, ಸಾರ್ವಜನಿಕ ಜೀವನ ಮತ್ತು ಶೈಕ್ಷಣಿಕ ಕ್ಷೇತ್ರಗಳಿಗೆ ಸೇರಿದ ವ್ಯಕ್ತಿಗಳು ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.
ಆದಿತ್ಯ ಶ್ರೀನಿವಾಸನ್ ಸುಪ್ರೀಂ ಕೋರ್ಟ್ ವಕೀಲ ಹಾಗೂ ಹಾರ್ವರ್ಡ್ ಪದವೀಧರ. ಸಂಘದೊಂದಿಗಿನ ಒಡನಾಟದಿಂದ ಕಲಿತ ಜೀವನಪಾಠಗಳನ್ನು ದಾಖಲಿಸಿದ್ದಾರೆ.
ವಿಜಯ್ ಸುಬ್ರಮಣಿಯನ್ ಚಲನಚಿತ್ರ ನಿರ್ಮಾಪಕ ಮತ್ತು ಪ್ರತಿಭಾ ನಿರ್ವಾಹಕ. ಭಾರತದ ಸಾಂಸ್ಕೃತಿಕ ಆತ್ಮವನ್ನು ಜೀವಂತವಾಗಿಡುವಲ್ಲಿ ಸಂಘದ ಪಾತ್ರವನ್ನು ವಿವರಿಸಿದ್ದಾರೆ.
ಜರ್ಮನಿಯ ಹೆಸ್ಸೆನ್ ರಾಜ್ಯದ ಶಾಸಕರು, ಎಡಪಂಥೀಯ ಹಿನ್ನೆಲೆಯ ಈ ಲೇಖಕರು, ಸಂಘದ ಮೂಲಕ ತಮ್ಮ ಭಾರತೀಯ ಅಸ್ಮಿತೆಯನ್ನು ಕಂಡುಕೊಂಡ ಅನುಭವ ಹಾಗೂ ಫ್ರಾಂಕ್ಫರ್ಟ್ನಲ್ಲಿ ಶಾಖೆ ಆರಂಭಿಸಿದ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.
ವಿಕ್ರಾಂತ್ ಮಸ್ಸಿ ಚಿತ್ರೀಕರಣದ ಸಂದರ್ಭದಲ್ಲಿ ದೂರದ ಪ್ರದೇಶಗಳಲ್ಲಿ ಕಂಡ ಸಂಘದ ಉಚಿತ ಶಿಕ್ಷಣ ಮತ್ತು ಸೇವಾ ಚಟುವಟಿಕೆಗಳ ಕುರಿತು ಬರೆದಿದ್ದಾರೆ.
ರುಬಿಕಾ ಲಿಯಾಕತ್ ಪತ್ರಕರ್ತೆಯಾಗಿ ಜೈಪುರದ ಮುಸ್ಲಿಂ ಕುಟುಂಬದಲ್ಲಿ ಬೆಳೆದ ತಮ್ಮ ಅನುಭವ ಹಾಗೂ ರೇಶಿಂಬಾಗ್ ಭೇಟಿಯ ಕುರಿತು ಬರೆದಿದ್ದಾರೆ.
ಅಂಕಿತ್ ಗುಪ್ತಾ ಸಂಘದಿಂದ ಕೋವಿಡ್ ಸಂದರ್ಭದಲ್ಲಿ ದುರ್ಬಲ ವರ್ಗಗಳಿಗೆ ದೊರೆತ ಬೆಂಬಲವನ್ನು ದಾಖಲಿಸಿದ್ದಾರೆ.
ವಿಶೇಷ್ ರಘುವಂಶಿ ಅರ್ಜುನ ಪ್ರಶಸ್ತಿ ಪುರಸ್ಕೃತ ಬಾಸ್ಕೆಟ್ಬಾಲ್ ಆಟಗಾರ. ಶಾಖೆಯ ಅನುಭವದಿಂದ ಅಸಾಂಪ್ರದಾಯಿಕ ಕ್ರೀಡೆಯನ್ನು ಆಯ್ಕೆ ಮಾಡಿಕೊಂಡ ಪ್ರೇರಣೆಯನ್ನು ವಿವರಿಸಿದ್ದಾರೆ.
ಬೃಂದಾ ಘೋಟಕ್ ಮುಂಬೈ ಮೂಲದ ಉದ್ಯಮಿ. ಸಂಘದ ನಿರ್ವಹಣಾ ಪದ್ಧತಿ ಮತ್ತು ಸಂಘಟನಾ ವ್ಯವಸ್ಥೆಯ ಕುರಿತು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಸ್ವಾಮಿ ಸರಸ್ವತಿ ಸಾಗರ್ ಸಂಘದಿಂದ ಪಡೆದ ಮೌಲ್ಯಗಳು ಮತ್ತು ವಿದ್ಯಾರ್ಥಿವೇತನ ಸಂಬಂಧಿತ ಸೇವಾ ಚಟುವಟಿಕೆಗಳನ್ನು ವಿವರಿಸಿದ್ದಾರೆ.
ಭಾಷಾ ಸುಂಬ್ಲಿ ನಟಿ. ಸ್ಥಳಾಂತರಗೊಂಡ ಕಾಶ್ಮೀರಿ ಪಂಡಿತರಿಗಾಗಿ ಸಂಘ ನಡೆಸಿದ ಶಿಬಿರಗಳೊಂದಿಗಿನ ತಮ್ಮ ಬಾಲ್ಯದ ಅನುಭವಗಳನ್ನು ದಾಖಲಿಸಿದ್ದಾರೆ.
ನಿಖಿಲ್ ಛಾಬ್ರಾ ವಿಭಜನೆಯ ಸಂದರ್ಭದಲ್ಲಿ ನಿರಾಶ್ರಿತರಾದ ಕುಟುಂಬದ ಮೂರನೇ ತಲೆಮಾರಿನ ಸದಸ್ಯ. ಸಂಘದೊಂದಿಗಿನ ಬಾಂಧವ್ಯ ಮತ್ತು ಸೇರ್ಪಡೆಯ ಭಾವನೆಯನ್ನು ವಿವರಿಸಿದ್ದಾರೆ.
ರಿಷಭ್ ಷಾ ಯುವಜನರ ನೇತೃತ್ವದ ಮಾದರಿ ವಿಶ್ವಸಂಸ್ಥೆ ಉಪಕ್ರಮವನ್ನು ಮುನ್ನಡೆಸುವವರು. ನಾಗ್ಪುರದಲ್ಲಿ ಕಂಡ ಶಿಸ್ತು ಮತ್ತು ಸಂಘಟನಾ ವ್ಯವಸ್ಥೆಯ ಬಗ್ಗೆ ಬರೆದಿದ್ದಾರೆ.
ಸೈನಾ ನೆಹ್ವಾಲ್ ಒಲಿಂಪಿಕ್ ಪದಕ ವಿಜೇತ ಬ್ಯಾಡ್ಮಿಂಟನ್ ತಾರೆ. ಪುಸ್ತಕದ ಕೊನೆಯ ಲೇಖನದಲ್ಲಿ ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.
ಇದಲ್ಲದೆ ಬ್ರಿಟಿಷ್ ವಿದ್ವಾಂಸರೊಬ್ಬರು ಯುರೋಪಿನ ಉದಾರವಾದಿ ದೃಷ್ಟಿಕೋನದಿಂದ ಸಂಘದ ಶತಮಾನದ ಪಯಣವನ್ನು ವಿಶ್ಲೇಷಿಸಿದ್ದಾರೆ.

ಸಾವಿರಾರು ಸಾಮಾನ್ಯ ದಿನಗಳ ಪರಿಶ್ರಮವೇ ಶತಮಾನದ ಇತಿಹಾಸ
ಪುಸ್ತಕದಲ್ಲಿನ ಸೈನಾ ನೆಹ್ವಾಲ್ ಅವರ ಲೇಖನದ ಭಾಗವನ್ನು ಉಲ್ಲೇಖಿಸಿದ ರಶ್ಮಿ ಸಾಮಂತ್, ಯಾವುದೇ ಸಂಸ್ಥೆಯ ನೂರು ವರ್ಷಗಳ ಇತಿಹಾಸವು ಬೆರಳೆಣಿಕೆಯಷ್ಟು ಅಸಾಧಾರಣ ದಿನಗಳಿಂದ ನಿರ್ಮಾಣವಾಗುವುದಿಲ್ಲ.ಬದಲಾಗಿ ಹತ್ತಾರು ಸಾವಿರ ಸಾಮಾನ್ಯ ದಿನಗಳ ನಿರಂತರ ಪರಿಶ್ರಮದಿಂದ ರೂಪುಗೊಳ್ಳುತ್ತದೆ ಎಂಬ ಸಂದೇಶವನ್ನು ವಿವರಿಸಿದರು. ವಿಪತ್ತುಗಳು, ಯುದ್ಧಗಳು, ಬರಗಾಲ ಮತ್ತು ಕೋವಿಡ್ನಂತಹ ಸಂಕಷ್ಟದ ಸಂದರ್ಭಗಳಲ್ಲಿ ಸಂಘದ ಸ್ವಯಂಸೇವಕರು ಸೇವಾಕಾರ್ಯಗಳಲ್ಲಿ ತೊಡಗಿಸಿಕೊಂಡಿರುವುದನ್ನು ಅವರು ಸ್ಮರಿಸಿದರು. ಇಂತಹ ಕಾರ್ಯಗಳನ್ನು ನಿರ್ವಹಿಸುವ ಸಾವಿರಾರು ಕಾರ್ಯಕರ್ತರು ವೈಯಕ್ತಿಕವಾಗಿ ಪ್ರಸಿದ್ಧರಾಗದಿದ್ದರೂ, ಅವರ ನಿರಂತರ ಪರಿಶ್ರಮವೇ ಸಂಘದ ಶತಮಾನದ ಪಯಣಕ್ಕೆ ಆಧಾರವಾಗಿದೆ ಎಂಬುದು ಈ ಲೇಖನದ ಪ್ರಮುಖ ಆಶಯವಾಗಿದೆ.
1962ರ ಭಾರತ-ಚೀನಾ ಯುದ್ಧದ ನಂತರ, ಅಂದಿನ ಪ್ರಧಾನಿ ಜವಾಹರಲಾಲ್ ನೆಹರೂ ಅವರು 1963ರ ಗಣರಾಜ್ಯೋತ್ಸವದ ಪಥಸಂಚಲನದಲ್ಲಿ ಭಾಗವಹಿಸಲು ಸುಮಾರು 3,500 ಆರ್ಎಸ್ಎಸ್ ಸ್ವಯಂಸೇವಕರನ್ನು ಆಹ್ವಾನಿಸಿದ್ದ ಘಟನೆಯನ್ನೂ ಅವರು ಉಲ್ಲೇಖಿಸಿದರು. ಈ ಐತಿಹಾಸಿಕ ಕ್ಷಣದ ಛಾಯಾಚಿತ್ರವೇ ಪುಸ್ತಕದ ಮುಖಪುಟದಲ್ಲಿ ಸ್ಥಾನ ಪಡೆದಿದೆ ಎಂದು ತಿಳಿಸಿದರು.
ಅನುಭವಗಳ ಮೂಲಕ ಸಂಘದ ಶತಮಾನದ ಪಯಣ
ತಾವು ಕೂಡ ಸ್ವಯಂಸೇವಕರೊಬ್ಬರ ಮಗಳಾಗಿ ತಮ್ಮ ಅನುಭವವನ್ನು ಪುಸ್ತಕದಲ್ಲಿ ದಾಖಲಿಸಿರುವುದಾಗಿ ರಶ್ಮೀ ಸಾಮಂತ್ ತಿಳಿಸಿದರು. ಈ ಕೃತಿಯಲ್ಲಿನ ಬಹುತೇಕ ಲೇಖಕರು ವೃತ್ತಿಪರ ಬರಹಗಾರರಲ್ಲ; ಬದಲಾಗಿ ತಮ್ಮ ಜೀವನದಲ್ಲಿ ಕಂಡು, ಅನುಭವಿಸಿ, ಅರ್ಥೈಸಿಕೊಂಡ ಸಂಗತಿಗಳನ್ನು ಹಂಚಿಕೊಂಡಿರುವ ಕಾರ್ಯಶೀಲರು. ಹೀಗಾಗಿ ಈ ಪುಸ್ತಕವು ಕೇವಲ ಸಾಹಿತ್ಯಿಕ ಕೃತಿಯಲ್ಲ, ವಿಭಿನ್ನ ವ್ಯಕ್ತಿಗಳ ಬದುಕಿನ ಅನುಭವಗಳನ್ನು ಓದುಗರ ಮನಸ್ಸಿಗೆ ತಲುಪಿಸುವ ಪ್ರಯತ್ನವಾಗಿದೆ ಎಂದರು.
ಸರಸಂಘಚಾಲಕ ಡಾ. ಮೋಹನ್ ಭಾಗವತ್ ಅವರು ಸಂಘವನ್ನು ನಿರಂತರವಾಗಿ ರೂಪುಗೊಳ್ಳುತ್ತಿರುವ ಮತ್ತು ಬೆಳೆಯುತ್ತಿರುವ ಪ್ರಕ್ರಿಯೆ ಎಂದು ವಿವರಿಸಿರುವುದನ್ನು ಸ್ಮರಿಸಿದ ಅವರು, ನೂರು ವರ್ಷಗಳ ಸಂಘಯಾತ್ರೆಯು ಒಂದು ಅಂತಿಮ ಗುರಿಯಲ್ಲ; ನಿರಂತರವಾಗಿ ಸಾಗುತ್ತಿರುವ ಸಮಾಜಮುಖಿ ಪ್ರಯಾಣವಾಗಿದೆ ಎಂಬ ಆಶಯವನ್ನು ವ್ಯಕ್ತಪಡಿಸಿದರು.
‘100 Years Young Rashtriya Swayamsevak Sangh’ ಕೃತಿಯು ಸಂಘದ ಇತಿಹಾಸವನ್ನು ಕೇವಲ ಘಟನೆಗಳು ಮತ್ತು ಸಾಧನೆಗಳ ಮೂಲಕವಲ್ಲದೆ, ಅದರೊಂದಿಗೆ ಬದುಕಿದ ಮತ್ತು ಬೆಸೆದುಕೊಂಡಿರುವ 20 ವಿಭಿನ್ನ ವ್ಯಕ್ತಿಗಳ ಅನುಭವಗಳ ಮೂಲಕ ಪರಿಚಯಿಸುವ ಪ್ರಯತ್ನವಾಗಿದೆ ಎಂದರು.
ಕಾರ್ಯಕ್ರಮದಲ್ಲಿ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ದಕ್ಷಿಣ ಮಧ್ಯ ಕ್ಷೇತ್ರೀಯ ಕಾರ್ಯವಾಹ ನಾ. ತಿಪ್ಪೇಸ್ವಾಮಿ, ಕರ್ನಾಟಕ ದಕ್ಷಿಣ ಪ್ರಾಂತ ಕಾರ್ಯವಾಹ ಡಾ. ಎಂ. ಜಯಪ್ರಕಾಶ್, ಶಿಕ್ಷಣತಜ್ಞ ಹಾಗೂ ಚಿಂತಕ ಡಾ. ಪಿ.ವಿ.ಕೃಷ್ಣಭಟ್, ಕರ್ನಾಟಕ ಮತ್ತು ಉತ್ತರ ಪ್ರಾಂತ ಪ್ರಚಾರ ಪ್ರಮುಖ್ ಅರುಣ್ ಕುಮಾರ್, ಕರ್ನಾಟಕ ದಕ್ಷಿಣ ಪ್ರಾಂತ ಪ್ರಚಾರ ಪ್ರಮುಖ್ ರಾಜೇಶ್ ಪದ್ಮಾರ್ ಉಪಸ್ಥಿತರಿದ್ದರು.
ಕಾರ್ಯಕ್ರಮದಲ್ಲಿ ಚಿಂತಕರು, ಸಾಮಾಜಿಕ ಕಾರ್ಯಕರ್ತರು, ಲೇಖಕರು, ಯುವ ಬರಹಗಾರರು ಉಪಸ್ಥಿತರಿದ್ದರು.