ಬೆಂಗಳೂರು: “ಒಂದು ಕಾಲದಲ್ಲಿ ಕುವೆಂಪು, ಬೇಂದ್ರೆಯವರಂತಹ ಶ್ರೇಷ್ಠ ಸಾಹಿತಿಗಳು ಜ್ಞಾನಪೀಠ ಪ್ರಶಸ್ತಿಗೆ ಭಾಜನರಾಗಿದ್ದರೆ ಈಗ 17 ಮಹಿಳೆಯರಿಂದ ಲೈಂಗಿಕ ದೌರ್ಜನ್ಯದ ಆರೋಪ ಎದುರಿಸುತ್ತಿರುವ ತಮಿಳು ಕವಿ ವೈರಮುತ್ತುವಿನಂಥವರಿಗೆ ಜ್ಞಾನಪೀಠ ಪ್ರಶಸ್ತಿ ದಕ್ಕುತ್ತಿದೆ. ಸಾಹಿತಿಗಳು ತಲೆ ತಗ್ಗಿಸುವ ಇಂಥ ಸನ್ನಿವೇಶದಲ್ಲಿ ‘ಅಖಿಲ ಭಾರತೀಯ ಸಾಹಿತ್ಯ ಪರಿಷದ್ (ಅಭಾಸಾಪ) ಕರ್ನಾಟಕ’ವು ಭಾರತೀಯ ಸಂವೇದನೆಯನ್ನೇ ಸರ್ಜಿಸುವ ಶ್ರೇಷ್ಠ ಸಾಹಿತಿಗಳಿಗೆ ಪುರಸ್ಕಾರ ಪ್ರದಾನಿಸುವ ಮೂಲಕ ಯಾವುದೇ ಸಾಹಿತ್ಯ ಸಂಸ್ಥೆಗೆ ಉತ್ತಮ ಮಾದರಿಯಾಗಿದೆ” ಎಂದು ಹಿರಿಯ ಸಾಹಿತಿ ಬಾಬು ಕೃಷ್ಣಮೂರ್ತಿ ಹೇಳಿದ್ದಾರೆ.

ಬೆಂಗಳೂರಿನ ನ್ಯಾಷನಲ್ ಕಾಲೇಜು ಸಭಾಂಗಣದಲ್ಲಿ ಅಖಿಲ ಭಾರತೀಯ ಸಾಹಿತ್ಯ ಪರಿಷದ್ ಆಯೋಜಿಸಿದ್ದ ಪುರಸ್ಕಾರ ಪ್ರದಾನ ಸಮಾರಂಭದಲ್ಲಿ ಪುರಸ್ಕಾರ ಪ್ರದಾತರಾಗಿ ಮಾತನಾಡಿದ ಅವರು, ‘ಜಗತ್ತಿನಲ್ಲಿ ಕೋಟ್ಯಂತರ ಡಾಲರ್ ಹಣವನ್ನು ನೀಡುವ ದೊಡ್ಡ ದೊಡ್ಡ ಪ್ರಶಸ್ತಿಗಳಿವೆ. ಭಾರತದಲ್ಲಿ ಜ್ಞಾನಪೀಠ, ಸರಸ್ವತಿ ಸಮ್ಮಾನ್ ನಂತಹ ಮೇರು ಪ್ರಶಸ್ತಿಗಳಿವೆ. ಕನ್ನಡದಲ್ಲಿ ಕುವೆಂಪು, ಬೇಂದ್ರೆ, ಶಿವರಾಮ ಕಾರಂತ, ಮಾಸ್ತಿ ವೆಂಕಟೇಶ ಅಯ್ಯಂಗಾರ್ ಅವರಂಹ ಶ್ರೇಷ್ಠ ಸಾಹಿತಿಗಳು ಜ್ಞಾನಪೀಠಕ್ಕೆ ಭಾಜನರಾದರು. ಆದರೆ ಇತ್ತೀಚೆಗೆ ಅತ್ಯಾಚಾರಿಯೂ ಭ್ರಷ್ಟನೂ ಆದ ಕೀಳಭಿರುಚಿಯ ದ್ವಂದ್ವಾರ್ಥಗಳ ತಮಿಳು ಗೀತರಚನೆಕಾರ ವೈರಮುತ್ತು ಎಂಬಾತನಿಗೆ ಆ ಪ್ರಶಸ್ತಿಯನ್ನು ನೀಡಲಾಗಿದೆ.‌ ಇದರಿಂದಾಗಿ ಜ್ಞಾನಪೀಠವನ್ನು ಕೈಯಲ್ಲಿ ಮುಟ್ಟಲೂ ಭಯವಾಗುತ್ತಿದೆ’ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಪ್ರಶಸ್ತಿಗಳು ತಮ್ಮ ಮೌಲ್ಯವನ್ನು ಕಳೆದುಕೊಂಡಿರುವ ದಿನಗಳಲ್ಲಿ ‘ಅಭಾಸಾಪ ಕರ್ನಾಟಕ’ವು ಕೆ. ಎಸ್. ನಾರಾಯಣಾಚಾರ್ಯರಂತಹ ಶ್ರೇಷ್ಠ ಸಾಧಕರಿಗೆ ಪುರಸ್ಕಾರ ನೀಡಿ ಉತ್ತಮ ಮೇಲ್ಪಂಕ್ತಿ ಹಾಕಿಕೊಟ್ಟಿದೆ ಎಂದು ಶ್ಲಾಘಿಸಿದರು.

‘ಭಾರತದ ಸಾಹಿತ್ಯ ಪ್ರಪಂಚಕ್ಕೆ ಕರ್ನಾಟಕದ ಕೊಡುಗೆ ಅನನ್ಯವಾದದ್ದು. ಪಂಪನಿಂದ ಹಿಡಿದು ಕುವೆಂಪು, ಬೇಂದ್ರೆ, ತರಾಸು, ಅನಕೃ ಅವರಂತಹ ಸಾಹಿತಿಗಳವರೆಗೆ ಸಾವಿರಾರು ಜನ ಸಾರಸ್ವತ ಲೋಕಕ್ಕೆ ಅನನ್ಯ ಕೊಡುಗೆ ನೀಡಿದ್ದಾರೆ. ಆದರೆ ಅವರ ಕೊಡುಗೆಗಳು ಉತ್ತರ ಭಾರತಕ್ಕೆ ತಿಳಿದಿಲ್ಲ. ಇಡೀ ಭಾರತಕ್ಕೆ ಅವರ ಕಾರ್ಯಗಳನ್ನು ಪರಿಚಯಿಸುವ ಕೆಲಸ ಆಗಿಲ್ಲ. ಕಾದಂಬರಿಕಾರ ಎಸ್.ಎಲ್. ಭೈರಪ್ಪನವರ ಕೃತಿಗಳು ಭಾರತದ ಹಲವು ಭಾಷೆಗಳಿಗೆ ಅನುವಾದವಾದವು. ಇಂಥ ಕಾರ್ಯಗಳು ಹೆಚ್ಚು ಹೆಚ್ಚು ನಡೆಯಬೇಕು. ಶತಾವಧಾನಿ ಗಣೇಶ್ ಅವರಂತಹ ಸಾಧಕರು ದೇಶದ ಬೇರೆ ಬೇರೆ ರಾಜ್ಯಗಳಿಗೆ ತೆರಳಿ ಕನ್ನಡದ ಕಂಪನ್ನು ಪಸರಿಸಬೇಕು. ಅಭಾಸಾಪ ಈ ನಿಟ್ಟಿನಲ್ಲಿ ಕೆಲಸ ಮಾಡಲಿ’ ಎಂದು ಆಶಿಸಿದರು.

ನನ್ನ ಸಾಧನೆಗೆ ಅನಕೃ ಕಾರಣ: ಶಾ.ಮಂ.ಕೃಷ್ಣರಾಯ

ಆದಿಕವಿ ಪುರಸ್ಕಾರ ಪಡೆದ ಹಿರಿಯ ಸಾಹಿತಿ ಶಾ.ಮಂ. ಕೃಷ್ಣರಾಯ ಮಾತನಾಡಿ, ‘ನನ್ನ ಪ್ರಾಥಮಿಕ ಶಾಲಾ ಶಿಕ್ಷಕ ದ. ರಾ. ಭಟ್ ಹಾಗೂ ಕನ್ನಡದ ಶ್ರೇಷ್ಠ ಸಾಹಿತಿ ಅ. ನ. ಕೃಷ್ಣರಾಯರು ನನ್ನ ಬದುಕಿನ ದಿಕ್ಕನ್ನೇ ಬದಲಿಸಿದವರು. ನನ್ನ ಇವತ್ತಿನ ಸಾಧನೆಗೆ ಅನಕೃ ಅವರೇ ಕಾರಣ’ ಎಂದು ಸ್ಮರಿಸಿದರು.

ಋಗ್ವೇದದಲ್ಲಿ ವಾಗ್ದೇವಿ ಉಲ್ಲೇಖ: ಸಹನಾ

ವಾಗ್ದೇವಿ ಪುರಸ್ಕಾರಕ್ಕೆ ಭಾಜನರಾದ ಕಾದಂಬರಿಗಾರ್ತಿ ಸಹನಾ ವಿಜಯ್ ಕುಮಾರ್ ಮಾತನಾಡಿ, ‘ವಾಗ್ದೇವಿಯ ಉಲ್ಲೇಖ ಋಗ್ವೇದದಲ್ಲಿ ವಾಗಂಭ್ರಣಿ ಸೂತ್ರದಲ್ಲಿ ಬರುತ್ತದೆ. ಅಂಭ್ರಣಿ ಋಷಿಯ ಮಗಳು ವಾಣಿ. ಆಕೆ ವಾಕ್‌ಗೆ ಅಧಿದೇವಿ. ಆಕೆಯೇ ಸಮಸ್ತ ಸೃಷ್ಟಿಗೆ ಕಾರಣಳು. ಜ್ಞಾನಸೂಕ್ತ, ಸರಸ್ವತಿ ಸೂಕ್ತಗಳೂ ಇವೆ. ನಮ್ಮ ಪರಂಪರೆಯಲ್ಲಿ ವಾಕ್, ಮಾತು ಅಥವಾ ವಾಣಿಯನ್ನು ಬಹಳ ಚೆನ್ನಾಗಿ ಕಟ್ಟಿಕೊಡಲಾಗಿದೆ. ಮಾತಿನ ಹುಟ್ಟು ಮತ್ತು ಅಭಿವ್ಯಕ್ತಿಗೆ ಉನ್ನತವಾದ ಸ್ಥಾನಮಾನ ಕೊಟ್ಟ ಪರಂಪರೆ ನಮ್ಮದು. ವಾಗ್ದೇವಿ ಪುರಸ್ಕಾರ ಅತ್ಯಂತ ಸಂತೋಷ ತಂದಿದೆ ‘ ಎಂದು ಸಂತಸ ವ್ಯಕ್ತಪಡಿಸಿದರು.

ಅಭಾಸಾಪ ರಾಜ್ಯಾದ್ಯಂತ ಕ್ರಿಯಾಶೀಲ: ಎಸ್. ಜಿ. ಕೋಟಿ

ಅಭಾಸಾಪ ಕರ್ನಾಟಕದ ಅಧ್ಯಕ್ಷ ಎಸ್. ಜಿ. ಕೋಟಿ ಮಾತನಾಡಿ, ‘ಅಭಾಸಾಪ ಸಂಘಟನೆ ಈಗ ರಾಜ್ಯದ ಉದ್ದಗಲದಲ್ಲಿ ಕ್ರಿಯಾಶೀಲವಾಗಿದೆ. ಕಡಿಮೆ ವೆಚ್ಚ ಅಥವಾ ವೆಚ್ಚವೇ ಇಲ್ಲದೆ ಕಾರ್ಯಕ್ರಮಗಳನ್ನು ಆಯೋಜಿಸುವುದು ಅಭಾಸಾಪ ವಿಶೇಷತೆ. ಸಂಘಟನೆಯು ಕನ್ನಡನಾಡಿಗೆ ತನ್ನನ್ನು ತಾನು ಗಟ್ಟಿಯಾಗಿ ಸಮರ್ಪಿಸಿಕೊಂಡು ಕಾರ್ಯಪ್ರವೃತ್ತವಾಗಿದೆ‌. ನಿವೃತ್ತ ಪ್ರಾಧ್ಯಾಪಕ ಬೆಳಗೋಡು ರಮೇಶ ಭಟ್ ಸಂಪಾದಕತ್ವದಲ್ಲಿ ‘ಸಹಿತ’ ಪತ್ರಿಕೆ ಹೊರಬರುತ್ತಿದೆ. ಸಾಹಿತ್ಯಾಸಕ್ತರು ಮತ್ತು ಬರೆಹಗಾರರು ಇದಕ್ಕೆ ಕೈಜೋಡಿಸಬೇಕು. ಸಾಹಿತ್ಯ ಪ್ರೇಮಿಗಳು ಮತ್ತು ಅನುಕೂಲಸ್ಥರು ತಮ್ಮ ಸಹಾಯ ಹಸ್ತವನ್ನು ಚಾಚುವ ಮೂಲಕ ಅಭಾಸಾಪ ಕಾರ್ಯಗಳಿಗೆ ನೆರವಾಗಬೇಕು’ ಎಂದು ಮನವಿ ಮಾಡಿದರು.

ಅಭಾಸಾಪ ರಾಜ್ಯ ಪ್ರಧಾನ ಕಾರ್ಯದರ್ಶಿ ರಘುನಂದನ್ ಭಟ್ ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ಬೆಂಗಳೂರು ಗ್ರಾಮಾಂತರ ಜಿಲ್ಲಾ ಕಾರ್ಯದರ್ಶಿ ಡಾ. ನವೀನ್ ಭಟ್ ಗಂಗೋತ್ರಿ ಕಾರ್ಯಕ್ರಮ ನಿರ್ವಹಿಸಿದರು. ಬೆಂಗಳೂರು ದಕ್ಷಿಣ ಜಿಲ್ಲಾ ಅಧ್ಯಕ್ಷ ಡಾ. ಎ. ಭಾನು ವಂದಿಸಿದರು.

Leave a Reply

Your email address will not be published.

This site uses Akismet to reduce spam. Learn how your comment data is processed.