ಬೆಂಗಳೂರು, ಮಾರ್ಚ್ 7: ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆಯ ಮುನ್ನಾದಿನ ಕೇಂದ್ರದ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಡಾ. ಮನಸುಖ್ ಮಾಂಡವೀಯ ಅವರು ಇಲ್ಲಿನ ರಾಜರಾಜೇಶ್ವರಿ ನಗರದಲ್ಲಿರುವ ಜಯದೇವ ಸ್ಮಾರಕ ರಾಷ್ಟ್ರೋತ್ಥಾನ ಆಸ್ಪತ್ರೆ ಮತ್ತು ಸಂಶೋಧನ ಸಂಸ್ಥೆಯಲ್ಲಿ (ಜೆ.ಎಂ.ಆರ್.ಎಚ್ & ಆರ್.ಸಿ) ಓಬಿಜಿ ವಿಭಾಗವನ್ನು (ಪ್ರಸೂತಿ ಮತ್ತು ಸ್ತ್ರೀರೋಗ ಶಾಸ್ತ್ರ) ಉದ್ಘಾಟಿಸಿದರು.
ಜೆ.ಎಂ.ಆರ್.ಎಚ್ & ಆರ್.ಸಿ.ಯ ಓಬಿಜಿ ವಿಭಾಗವು ಖ್ಯಾತ ಪ್ರಸೂತಿ ಮತ್ತು ಸ್ತ್ರೀರೋಗ ತಜ್ಞರಾಗಿರುವ ಡಾ. ಲತಾ ವೆಂಕಟರಾಮ್ ಅವರ ನೇತೃತ್ವದಲ್ಲಿ ನಡೆಯುತ್ತಿದ್ದು, ಸಮಾಜದ ಎಲ್ಲ ವರ್ಗದವರಿಗೆ ರಿಯಾಯಿತಿ ದರದಲ್ಲಿ ಚಿಕಿತ್ಸೆ ಒದಗಿಸುವುದು ಆಸ್ಪತ್ರೆಯ ಧ್ಯೇಯವಾಗಿದೆ. ನೈತಿಕ ಹಾಗೂ ಪುರಾವೆ ಆಧಾರಿತ (ಎವಿಡೆನ್ಸ್ ಬೇಸ್ಡ್) ಕಾರ್ಯಾಚರಣೆಗೆ ಒತ್ತುಕೊಡಲಾಗುವುದು.
